Nova Istra

161 Marijan JELENIĆ PRILOG O ZAVIČAJU vaguoni od blaga so se napeštali koliki so mogli i mahali. Kat je makina zašvikala, počela hitat iskri, dimit, klepetat, i kat se je levala, si so plakali, uni na makine, i uni ča so ustali. Jeni i drugi so si mahali z rokami. I plakali, plakali. Makino so videli samo do spot mosta kade zavrne proti Galižane. Mat unako mića nî ni zapoštala lice sojega oca. Samo se domišlja kako jo je otac buševajuć zbuo sojuon neubriton braduon. I to je se ča je cielega života imela ot sojega oca. I za doma so šli preku Odnjana i se domišlja da je poli često va Odnjane bila jena vela kuća, palac, na kien so bile škurnice. Ma ne kako va sele od dasak, nego gospotske, na riebra. To kućo će i potle čuda liet videt na senen meste kat buode va Odnjano na nogi hodila kupovat litro ulja za kilo pršuta, ali kat buo na svetaga Blaža hodila molit da je Buoh učuva ot bolesti guta. Nuono je ša, kako so vajk stareji poviedali, va ojsko va Galicijo za se ča niedan ni zna kade je to. Nuono ni zna štet i ni pisat, pak se je rietko javi doma samo kat mu je kakuof kumpanj napisa kartolino. Njegove Lucete i dice je zustalo samo uno malo zemlji, pozemuljčica i nebo zgora njih. Nuona je bila strašno kapaca delat. Diboto vajk je hodila bosa. Si tri otročići je zemala sobon h blagu, na kampanjo i sako nedeljo za ruoko peljala h maše va Žminj. To se uniput ni nikat čulo da je ki zusta pres maši. Ku je ki fali poli maši, si so znali da je bolan. A potle puolne nuona je z dicon hodila h Svete Marije ot Svetega Muora molit Boga za muoža, za pržonieri, za marinaji, za uni ki so ubiti va ojske, za dušice va Čičilišće. S seh siel so ljudi hodili molit. I cielo potle puolne je luopica bila puna ljudi. Si so molili na šaliže na kolenah. Nuona je na muža dobivala sušilijo, šoldi da je mogla dice kupit kruh i mlieko. Je imela jeno kravo i par ovac. Sako leto je zgojila praščića. Za kupit prašćića je muo- rala šparat od šušiliji. Nî ni una znala štet ni pisat, ma je bila sakrabujska. Je znala si svieci, se fešti, se štuorice. Finta je znala zračunat kat će bit Ozan, ali kat je Ozan bi magari pret pedesiet liet. Vajk je dice guorila: „Šu, homo delat!“. Pepo fant z Žminja je z bičikleton po sielah nosi pošto. Tako je jedan dan i nu- one donesa pismo s črnen fašon se naokolo. I reka. „To so martuorji. Mi je žal van povedat, ma to će reć da je vaš Zvane ubit. Piše: va Galicije.“ Malo kakova žienska se je nadijala da će muoš prit doma. Luce je zabielela. Je utrdla kako grota i komoć za ruoki ziela drobne Marijo i Rožo. Jožić je poli janjeh teka kako janjčić. Kat so po škalah od baladuora prišli va kućo, Luce je sela na banak od ugnjišća, je odvesila Lužar, ruoki je prekrižila z Lužaron na krile i je gledala samo va uganj. Dičica so sedela na drugen banke kako mrtvi. So gledali tužno mater. Foši bi bili i zaspali unde da praščić va dore ni poče jako tulet aš je bi lačan. Luce se je komoć otkinula ot banka. Je šla zduolon po škalah. Prahcu je hitila par klasi trukinji, krave hitila siena i zaprla prkat ot ovac. Dica niso nič kapili. Ma