Nova Istra

160 Marijan JELENIĆ, Vodnjan POTLE STUO LIET Dva miljara i osamnaestega leta je stuo liet ot finjietka Prve ojski. Mat mi je čuda puti poviedala, kako je njiejni otac Zvane bi rićaman. I čuda drugeh muškieh z Žminja i seh kraj z Istriji. So si muorali poć va Pulo. Najveć hi je šlo z makinon. Unde so nekoliko dan delali manuori. I so hi napuotili kamo i kako ki trieba puoć. Moja nuona Luce je ziela si tri otroki i je tela prvo nego nuono poje s Pula još ga jedanput videt. S Haluz, s sela pod žminjski turan, hi je na oziće s tovarčići popelja Mate Guobac. Uon ni bi čitovat. Ni moga delat. Ma je mrkancova. Va Pulo je pelja drievo. I vino kontrabant va Pulo i va Labin. Moja mat je uniput imela samo četira leta. So se levali zajno potle polnoći. Se domišlja kako se je s puoten već puti zbudila od zimi i drmanja ozića i videla samo zviezdi gore na nebe. Va Pulo so prišli sunčevileza. Koli štacijuona je bilo na stotine ozić s tovari i z kravami. Ki god je moga je priša videt sojega oca i muoža prvo nego će puoć na fruont. Z ojski se rietki tornajo živi i čitovati. Koli stacijuona se je čuda ljudi motalo. Saki je iska sojiega. Žienske so se imele črni brhani do tal i črni fačuol viežen s pot bradi. Zvane je soji zajno naša. Je priša bliže zmed stotin i stotin muš- kieh. I saki je imie promeš samo puol uri. Puol uri je zajno pasalo. Malo kiega se je čulo guorit. Najveć so si mučali i se gledali. Na kraje je otac stisa sakega otroka na prsa i z suzami buša. Tako i Luceto, ne znajeć će li se kada ali ne tornat doma. I komandant je strogo zapoveda: „Na makino!“. Luce, tri otočići i Mate Guobac, i čuda drugeh so gledali kako si uplakani gredo na makino. Na vratah od makini i na uknah so bile se glava do glavi. Na vratah