92 OGLEDI ZAVIČAJNI Milan RAKOVAC Ma si vidija paka vraga na batu: da ča bilo – bilo za vajk je, aš da vrime ne pasiva, piše uon! T’r laglje će biti da je nego da ni? A tu negdje gvire Isaac Asimov i Arthur Clarke, a Učke zguora, u Empireju, se smihljaju Jure Žakan i Balota i Črnja – aj t’r vero naša vajk gori gre. Sakramiensko sime i simienja sime ča batvo ž njega potiegne babevise kroza snig i grotu z vrimena pripostanja valje ‘vamo mrež nas. Biletić, detto Bob (ma ne naš bob, nego po ‘merikansku), se fida zatući nuos u nevidno i spridvidno i uzadvidno, rabi kuraja, nu, samo ča se vidi da vuon tamo i vidi, tamo, din, di drugo niš ni viti i tamo di još ne moreš viti. Kako zvore brazdu svitakraju pak zjama kamik i ga ukleše i u tuoj brazdi doprtoj zapre se zidajući prez ni gledati ni se libieći zidić, a zduola su funadamienti, a zguora čvrljuga, ma zguora neba samega kanta mu kanat „proti pozabljienja“. „Ma zala ljuta, zala ljutica šegavica to je sintagma čakavska, hrvacka, nju san iska i naša u njidrih u ljudan i ženan napošto, i hotično u sebi samen“. Na van kako kreše Biletić i kleše i kuje i runi i truni i plesne i nažge i busa i trupa i kopuna te ka’i da niete dȁ, ma je ben čuješ, žlepu mu, bolje nego’j baderljanska zvona ča san hi jedan bot sluša valje svitazduola u Woolongong‘Štralija di mi je bila zrmana Marija Tuonova... Raca vikovična, a ča drugega? Bob sinjiva i šenjiva i sanjiva vierše u voganj u lug mrež zvizde do črne škulje pak nazda na se. No, i ZATO ŠTO VRIME NE PROLAZI, jerbo jamačno prolazimo mi brže nego SUZE SVIETEGA LUOVRE ča jangušta rastriplju meteore zguora neba kako ča dotični rashiti veraš kako tobože da niete dȁ, napuštu, mierlo, kako da šenicu sije, prez vrah puoti. „Az / klesar / imam si pismu… Az klesar / ko opat poslanik / Az rob kamena“… „Blato, pa / Ne zove se otok / U otoku. / Ma ni svi škoji / Ča pivaju, / I viški i lastovski / Himan spokoja / U meni.“
RkJQdWJsaXNoZXIy Mjc2NzM=